വന്ദനം യേശുപരാ നിനക്കെന്നും വന്ദനം യേശുപരാ
വന്ദനം യേശുപരാ നിനക്കെന്നും
വന്ദനം യേശുപരാ
വന്ദനം ചെയ്യുന്നു നിന്നടിയാര്‍ തിരു
നാമത്തിന്നാദരവായ്.
ഇന്നു നിന്‍ സന്നിധിയില്‍ അടിയാര്‍ക്കു
വന്നു ചേരുവതിനായ്
തന്ന നിന്നുന്നതമാം കൃപയ്ക്കഭി-
വന്ദനം ചെയ്തിടുന്നേ
നിന്‍രുധിരമതിനാല്‍ പ്രതിഷ്ഠിച്ച
ജീവപുതുവഴിയായ്‌
നിന്നടിയാര്‍ക്കു-പിതാവിന്‍ സന്നിധൌ
വന്നിടാമേ സതതം
ഇത്ര മഹത്വമുള്ള പദവിയെ
ഇപ്പുഴുക്കള്‍ക്കരുളാന്‍
പാത്രതയേതുമില്ല നിന്‍റെ കൃപ
എത്ര വിചിത്രമഹോ
വാനദൂതഗണങ്ങള്‍ മനോഹര
ഗാനങ്ങളാല്‍ സതതം
ഊനമെന്യേ പുകഴ്ത്തി സ്തുതിക്കുന്ന
വാനവനേ നിനക്കു
മന്നരില്‍ മന്നവന്‍ നീ മനുകുല-
ത്തിന്നു രക്ഷാകാരന്‍ നീ
മിന്നും പ്രഭാവമുള്ളോന്‍ പിതാവിന്നു
സന്നിധൻ നീയല്ലയോ
നീയൊഴികെ ഞങ്ങള്‍ക്കു സുരലോകെ
ആരുള്ളു ജീവനാഥാ
നീയൊഴികെ ഇഹത്തില്‍ മറ്റാരുമി-
ല്ലാഗ്രഹിപ്പാന്‍ പരനേ
View Count: 704.
|